Ngjashmëria në pamje me Cristiano Ronaldon nuk i ka sjellë ndonjë të mirë një të riu shqiptar në Francë. Përkundrazi, 21-vjeçari, identiteti i të cilit nuk bëhet i ditur, e ka pësuar me një vit burgim për vjedhje.
Ngjarja ka ndodhur në Nansi, qytet në lindje të Francës. E përditshmja lokale “L’Est Republicain” e raporton atë çka ndodhi mbrëmjen e 8 shtatorit, kur dy persona tentuan të hynin në një banesë në Saint-Maks, në periferi të Nansisë. Në përpjekje për të thyer një dritare, burrat u pikasën nga i zoti i shtëpisë i cili iu vu pas.
Në dëshminë e tij në polici, burri deklaroi se njëri prej hajdutëve ishte sozi e yllit portugez të Realit të Madridit. Pak ditë më pas, pasi identikiti i shqiptarit qarkulloi në zonë, 21-vjeçari u vu në pranga së bashku me keqbërësin tjetër dhe u dënua me burg për një vit.
Panorama/d.i.
