Panik në qytetin Roubaix, në veri të Francës.
Dy persona të armatosur, që mendohet se janë grabitës, dyshohet të kenë marrë pengje brenda një shtëpie, ku tentuan të fshiheshin pas ndjekjes nga patrulla e policisë, në një ngjarje me disa të shtëna të ndodhur në qytetin verior të Francës, Roubaix.
Edhe pse nuk është qartësuar totalisht, nëse të armatosurit e kësaj ngjarjeje kanë lidhje me sulmet terroriste të Parisit, më 13 nëntor, që lanë 130 viktima dhe plagosën rreth 350 të tjerë, raportime paraprake thonë se kjo situatë pengmarrjeje apo grabitjeje nuk ka lidhje me terrorizmin. Lajmi bëhet i ditur nga burime të policisë franceze dhe nga komuna e Roubaix.
“Një operacion është në zhvillim e sipër, pas sinjalizimit për marrjen e disa pengjeve. Janë dëgjuar të shtëna dhe zona përreth vendit të ngjarjes është rrethuar”, tha një burim policor për “Reuters”. “Një drejtues banke dhe familja e tij besohen të jenë mes pengjeve”, shtoi më tej ai, ndërsa flitet për disa oficerë policie të plagosur gjatë shkëmbimzjarrit.
Shërbimet mjekësore dhe ato të zjarrfikëses konfirmuan zhvillimin e operacionit në Roubaix, që ndodhet shumë pranë kufirit me Belgjikën, por pa dhënë detaje të mëtejshme.