Franca u ka thënë diplomatëve të saj dhe zyrtarëve të ministrisë së jashtme që të shtyjnë për një kohë të pacaktuar të gjitha udhëtimet jo thelbësore në Iran, duke përmendur një komplot me bombë dhe një forcim të qëndrimit të Teheranit ndaj Francës.
Memoja përmend një komplot të fshehtë për të bombarduar një tubim të mbajtur nga një grup opozitar iranian në afërsi të Parisit, ku mori pjesë avokati i Trump, Rudy Giuliani, si një shenjë e qëndrimit më agresiv të Teheranit ndaj Francës.
“Sjellja e autoriteteve iraniane sugjeron një ngurtësim të pozitës së tyre përballë vendit tonë, si dhe ndaj disa prej aleatëve tanë”, shkroi Maurice Gourdault-Montagne, sekretari i përgjithshëm i ministrisë në njoftimin e datës 20 gusht.
“Duke pasur parasysh rreziqet e njohura të sigurisë, të gjithë zyrtarët e departamenteve, qoftë nga selitë apo postet (jashtë shtetit), duhet të shtyjnë deri në një njoftim të mëtejshëm, me përjashtim të punëve urgjente, çdo plan udhëtimi në Iran”, shtoi Gourdault-Montagne.
Ministria e jashtme franceze nuk pranoi të komentonte mbi memorandumin ose të thoshte nëse stafit të ambasadës u ishte kërkuar të riatdhesonin familjet e tyre.
Franca ka qenë një nga avokatët më të fuqishëm të shpëtimit të marrëveshjes bërthamore të vitit 2015 midis Iranit dhe fuqive botërore, nga e cila Presidenti i SHBA-ve Donald Trump u tërhoq në muajin maj.
Ekonomia e Iranit është prekur nga perspektiva e ri-vendosjes së sanksioneve të SHBA-së, të cilat ishin hequr nga marrëveshja. Vendet evropiane, duke përfshirë Francën, janë zotuar të përpiqen të zbusin goditjen ekonomike, por nuk kanë qenë në gjendje deri më tani të bindin firmat e tyre për të sfiduar Uashingtonin dhe për të qëndruar në Iran.
Gjiganti francez i naftës dhe gazit, Total, si dhe prodhuesit e makinave të PSA dhe Renault kanë udhëhequr një eksod të kompanive evropiane nga Irani, të frikësuar nga shtrirja jashtë territoriale e sanksioneve të Uashingtonit.
a.ç
