Ndërkohë që Donald Lu po takon një për një deputetët e Partisë Demokratike në Tiranë, Kryetari i Partisë Demokratike Lulzim Basha ka nisur një tur takimesh në vendet anëtare të Bashkimit Europian.
Pas Gjermanisë dhe Italisë, Basha është pritur në Greqi nga drejtues të lartë politike.
Në rrjetet sociale Basha njofton se u prit në takime të veçanta nga Kryetari i Nea Demokracia, Z.Kyriakos Mitsotakis dhe më pas ai zhvilloi një takim me Grupin Parlamentar të Nea Demokracia dhe me Kryetarin e Komisionit Parlamentar të Marrëdhënieve me Jashtë Kostas Duzinks raporton Mapo.
Kryetari i Partisë Demokratike u prit dhe nga Kryetari i Grupit Parlamentar të PASOK, Andrea Loverdos.
Por Basha, edhe pse e ka publikuar vetë në foto, nuk ka cituar emrin e një personazhi tepër të rëndësishëm që ka qenë në takim me të dhe që ndodhet në qendër.
Bëhet fjalë për ish-ministren e jashtme greke Dora Bokojanis.
Basha dhe Bokojanis u bënë protagonistë në vitin 2009 të nënshkrimit të paktit për delimitimin e shelfit kontinental mes dy vendeve, që më pas u rrëzua nga Gjykata Kushtetuese, pas padisë nga opozita e atëhershme, me pretendimin se marrëveshja ishte një “falje” e madhe që i bëhej Greqisë nga Shqipëria.
