“Daimler Benz Type 80” kishte potencialin për të qenë automobili më i shpejtë në botë. Ky superautomobil kishte motor 44.5-litërsh V12, të dizajnuar nga “Porsche” dhe të konstruktuar nga “Daimler Benz”. Por Lufta e Dytë Botërore bëri që automobili nuk hyri kurrë në funksion.
Në fund të viteve 1930, inxhinieria e automobilave garues në Gjermani ishte, nëse jo më e mira, ndër më të suksesshmet në botë. Gjermanët nuk ishin të parët vetëm në mbajtjen e rekordit të shpejtësisë që në atë kohë mbahej nga britanikët. Malcolm Campbell, Henry Segrave, George Eyston dhe John Cobb dominuan me automobilat e tyre në këtë sferë, shkruan sot “E Diela me Koha Ditore”.
Campbell ishte motorist anglez që rekordin për shpejtësi e arriti disa herë mes viteve ‘20 dhe ‘30 me automobilin e quajtur “Blue Bird”. Segrave ishte i njohur për shkak të tri rekordeve të shpejtësisë në tokë dhe një rekordi të shpejtësisë në ujë. Ai ishte personi i parë që me një automobil kaloi shpejtësinë prej 320 kilometrash në orë, transmeton Koha.net. George Eyston ishte garues britanik që po ashtu kishte thyer rekordin e shpejtësisë në vitet 1920-‘30. Cobb ishte një tjetër garues i njohur britanik që shkëlqeu me automobilat e tij të shpejtë. 
Eyston dhe Cobb brenda viteve 1938-39 arritën të çonin rekordin e shpejtësisë nga 502.115 kilometra në orë në mbi 555 e deri në 575 km/ orë. “Bisha” Thunderbolt e Eystonit kishte dy motorë të aeroplanëve V12 me kapacitet total prej 73.2-litrash me më shumë se 5000 kuaj fuqi. Automobili peshonte mbi tre tonë dhe ishte më i gjatë se 8.5 metra.
Por Hans Stuck, një vozitës i njohur gjerman, mendoi se mund të krijonte automobil edhe më të mirë. Ai iu afrua Ferdinand Porsches, që u pajtua të krijonte një superautomobil për shpejtësi të jashtëzakonshme në rrugë, dhe më pas mori lejen për të marrë një motor të aeroplanëve – Damiler Benz DB 600. Seria e Daibler DB600 kishte motorë V12 dhe kompania pranoi që të krijonte automobilin për të thyer rekordin e shpejtësisë në një autostradë të Gjermanisë. Zgjedhja e lokacionit ishte qesharake, por Adolf Hitler në atë kohë për çështje politike donte që ky tentim të kishte të bënte vetëm me Gjermaninë
