“Kep Merli” ishte resorti qe priti dje çiftin Sarkozy-Carla Bruni. Kjo, pasi mbrëmë në orën 21.00, Carla Bruni këndoi në Teatrin Antik të Butrintit në një koncert që zgjati rreth një orë e gjysmë.
Ajo ka kënduar rreth 25 këngë, ku mes tyre edhe 11 këngë nga albumi “French touch” (Prekje franceze), që është albumi i pestë i saj, i hedhur në treg në vitin 2017.
Carla Bruni këndoi edhe këngë nga disku i saj i parë me këngë franceze, i titulluar “Quelqu’un m’a dit”, një disk që u mirëprit në mbarë botën gjatë vitit 2002 dhe pati një rekord shitjesh. Ndërsa albumi më i fundit që ajo ia ka dedikuar Shqipërisë dhe që vetë Carla Bruni e quan më të preferuarin e saj albumin “French Touch”, që është realizuar nga David Foster, një producent i famshëm botëror.
Koncerti u dha në praninë e spektatorëve të veçantë, ku Carla Bruni gjatë gjithë kohës, që këndoi, po ndiqej me kënaqësi edhe nga bashkëshorti i saj, ish presidenti francez, Nikola Sarcozy, si dhe nga Kryeministri i Shqipërisë, Edi Rama dhe bashkëshortja e tij, Linda.
Teatri i Parkut Kombëtar të Butrintit, ku u mbajt koncerti është një nga pikat arkeologjike më të rëndësishme të trashëgimisë shqiptare dhe asaj botërore.
Bruni ka premtuar në një intervistë televizive në Shqipëri se herën tjetër “ajo do të vijë në Shqipëri bashkë me fëmijët për të ndenjur edhe disa ditë me pushime”.
Më poshtë, gazeta “TemA” po përcjell disa fotografi nga vizita e Nikola Sarcozy dhe Carla Brunit në Shqipëri. (TemA)
