Guardia di Finanzzia sekuestroi sot një sasi prej rreth 500 kilogramësh kanabis në një gomone. Gjatë aksionit u arrestuan dy skafistë shqiptarë. Ndërkohë policia shqiptare prangosi dy efektivë të Kufitares lidhur me këtë operacion.
Një prej të arrestuarve është nënkomisar Bledar Kuçi me detyrë përgjegjës turni në pikën kufitare, personi që shihni në foto.
Kuçi u arrestua pasi hetimet kanë dokumentuar se së bashku me punonjësin tjetër të Policisë Kufitare në Tri Port, Idlir Ajaza, nuk kanë kryer praktikën e rregullt ligjore për regjistrimin e mjetit lundrues tip gomone, i cili u kap në Brindizi me lëndë narkotike. Rezulton se mjeti lundrues, i cili figuron i regjistruar me dokumentacion në Stacionin Kufitar, ka hyrë në brendësi të Pikës Tri Port dhe pa u regjistruar ka dalë më pas në det.
Ndalimi i efektivëve u bë për veprën penale të “Shpërdorimit të detyrës”.
Policia e Shtetit deklaroi se në bashkëpunim me policinë italiane, finalizuan një operacion të përbashkët kundër trafikut të narkotikëve, duke sekuestruar 500 kg kanabis sativa.
Në Itali janë arrestuar dy trafikantët shqiptarë K. Skëndaj, 45 vjeç dhe F. Soda, 34 vjeç, për trafik ndërkombëtar droge./a.m.
