Gjendet në afërsi të fshatit Borizanë në Fushë Krujë një automjet i djegur tërësisht. Kanë qenë banorët e zonës të cilët kanë njoftuar policinë menjëherë pasi kanë lokalizuar tymin dhe flakët pranë disa shkurreve. Automjeti i djegur është një ‘Volkswagen Turan’. Mësohet se rreth këtij automjeti fshihen enigma të shumta pasi nuk dihet arsyeja pse është djegur dhe fshehur në atë vend.
Mesohet se në brendësi të automjetit gjendet një kufomë e djegur, çka do na çonte përpara një skene krimi. Makina është me targa të Mitrovicës, 02 960 SN, në pronësi të një shtetasi kosovar. Burimet saktësuan se automjeti ka hyrë përmes pikës së kalimit kufitar të Morinës rreth pesë ditë më parë.
Trupi i pajetë është i karbonizuar çka vështirëson identifikimin e viktimës. Ekspertët e kriminalistikës kanë mbërritur në vendin e ngjarjes dhe po punojnë për zbardhjen e ngjarjes së rëndë. Ndërsa ekipet mjeko-ligjore kanë marrë kufomën nga automjeti i djegur për t’i bërë ekspertizën në morgun e QSUT në kryeqytet. Nga ana tjetër, policia nuk ka lejuar afrimin e gazetarëve pranë automjetit të djegur, ndërkohë që vijon hetimet për zbardhjen e plotë të rrethanave të kësaj ngjarje.
/ma.me
