Shqiptarët e të gjitha trevave me banim në Bruksel kanë zhvilluar gjatë ditës së sotme një protestë paqësore në kryeqytetin e Bashkimit Evropian lidhur me krizën e armatosur në Kumanovë.
Lexuesit e “JAVA”-s kanë bërë me dije përmes postës elektronike se qindra shqiptarë të mbledhur nën slloganin “Ndal diskriminimit” janë grumbulluar në Place Schuman dhe kanë marshuar në heshtje.
Aktiviteti, i cili duket edhe në foton e dërguar pranë redaksisë së “JAVA”-s, mësohet të ketë qenë spontan pa ndonjë organizator të mirëfilltë përveç thirrjeve në Facebook dhe atij i janë bashkangjitur edhe kalimtarë të rastit të kombësive të tjera.
Mësohet se tubimi nuk ka qenë në mbështetje të UÇK-së apo ndonjë formacioni tjetër të shqiptarëve të Maqedonisë, por është bërë thirrje për paqe dhe transparencë nga pala hetimore.
