Hetimet për vdekjen e punëtorit shqiptar gjatë aksidentit teksa kryente punime ndërtimi dhe u godit nga betonierja në Pozallo (Ragussa) të Italisë, po vijojnë nga autoritetet për të zbardhur dinamikën dhe kushtet e sigurisë.
Artur Deliu, nga Tirana, por prej vitesh emigrant në vendin fqinj, humbi jetën tragjikisht, kurse një koleg i tij u plagos në gjendje të rëndë.
Mediat italiane kanë zbuluar edhe foto të 36-vjeçarit shqiptar, teksa komuniteti vendas dhe ai shqiptar kanë nisur mbledhjen e fondeve për të ndihmuar familjen me procedurat dhe përballimin e ceremonisë mortore dhe situatës.
Deliu mësohet se ishte i martuar dhe baba i dy fëmijëve. Ndërkohë që familjarë të tij kanë udhëtuar nga Shqipëria për në Itali për të ndjekur procedurat.
Mediat raportojnë se ata po kujdesen për shërbimin mjekësor të një prej fëmijëve të 36-vjeçarit, pasi dhimbja dhe gjendja e shokut është e madhe.
Arturi do të varroset në Shqipëri, në Tiranë, qytetin e tij të lindjes. Punëtori fatkeq kishte qenë në Itali për disa vite, fillimisht në Breshia dhe më pas u zhvendos në Siçili.
“Familja e punëtorit shqiptar ndodhet në Itali për të ofruar trajtim për njërën nga dy vajzat e tij”, informon media italiane.
Deliu u godit aksidentalisht nga krahu mekanik i hekurit të betonierës, gjatë procesit të hedhjes së betonit në çatinë e një objekti në ndërtim.
Ndërkohë, hetimi vazhdon. Ata po verifikojnë nëse pajisjet ishin në gjendje të mirë pune, nëse ishte kryer mirëmbajtje dhe nëse pompa e betonit i ishte nënshtruar kontrolleve periodike për të siguruar efikasitetin dhe sigurinë e saj.
Megjithatë, kontrolle po kryhen edhe në kantierin e ndërtimit, ku duhet të përcaktojnë nëse janë ndjekur rregulloret për të siguruar sigurinë e punëtorëve.
