82 banesa dhe një pallat janë bërë të pabanueshme në Durrës si pasojë e dëmeve të pësuara nga tërmeti i fuqishëm që goditi vendin tonë më 21 shtator. Nga bilanci paraprak po ashtu shpjegohet se edhe 111 banesa të tjera janë dëmtuar rëndë në të gjithë Durrësin. Qyteti bregdetar ka qenë më i prekuri nga lëkundjet për shkak të afërsisë me epiqendrën e tërmetit. Këto shifra janë bërë të ditura nga bashkia e Durrësit.
Gjeografia e shpërndarjes së shtëpive të pabanueshme është e përqendruar kryesisht në 3 njësi administrative Manëz, Sukth dhe Katund i ri me respektivisht 27, 24 dhe 19 shtëpi. Dëme janë regjistruar edhe në Rrashbull ku janë 13 shtëpi të dëmtuara dhe në Ishëm 7 shtëpi.
Në terren janë, 16 grupe vlerësimi në Durrës dhe 5 njësitë administrative, në përbërjen e secilit është një inxhinier ndërtimi. Këto grupe po bëjnë vlerësimin në çdo banesë të prekur nga tërmeti për të dalë më pas me një faturë përfundimtare të dëmeve në banesa e biznese.
Ndërkohë një pallat shumëkatësh në sektorin ”Iliria” të plazhit të Durrësit është vlerësuar si i pabanueshëm për shkak të dëmeve të pësuara nga tërmeti i fortë i 21 shtatorit.
Pallati është ndërtim i dekadës së fundit dhe është rrethuar me shirita bllokues për të shmangur hyrjen në të, si dhe dëmtimet e mundshme nga rëniet e suvasë në vazhdimësi.
E gjithë godina ka pësuar dëme të konsiderueshme strukturore brenda dhe jashtë, ndërsa banorët janë strehuar te të afërm dhe në Shtëpitë e Pushimit të ministrive që ndodhen në Plepa.
g.kosovari
