Trafiku ilegal i shqiptarëve drejt Anglisë mbetet ende edhe sot një nga problemet më të mëdha për autoritetet angleze dhe ato shqiptare. Pikërisht ditën e djeshme, policia angleze zbuloi 50 shqiptarë brenda një kamioni, të cilët sapo kishin mbërritur në zonën The Humber Sea Terminal në Killingholme.
Policia rrethoi një kamion me targa hungareze, me të cilët trasnportoheshin emigrantët shqiptarë.
Sipas asaj që shkruan gazeta “Grimsbytelegraph”, mes 50 shqiptarëve të ndaluar ishte edhe një grua shtatëzëne, e cila është dërguar menjëherë në spital.
Në këtë operacion u përfshinë 4 autombulanca dhe 5 makina policie, pasi në rrugë operative kishin marrë informacion për mbërritjen e kamionit nga porti Hook-of-Holland.
Shoferi hungarez është arrestuar me akuzën e transportimit të emigrantëve ilegalë.
Sipas mediave angleze, të cilat kanë hetuar trafikun e emigrantëve shqiptarë drejt Anglisë, mesatarisht shuma për të mbërritur në Angli që kërkohet nga trafikantët varion nga 6 dëri në 7 mijë euro.
Kryesisht trafikimi zhvillohet me kamionë nga portet e Holandës apo Belgjikës, përfshi Francën, nga ku trafikantët marrin me qera jahte me të cilat dërgojnë emigrantët drejt brigjeve angleze.
