Policia e Kosovës ka njoftuar këtë të mërkurë, më 4 mars, se ka vënë në pranga reperin Gramos Krasniqi, të njohur ndryshe me emrin e skenës “Mossi”.
Reperi ishte në kërkim për veprën penale “lëndim të lehtë trupor”, pasi akuzohet se ka dhunuar gazetarin e Gazetës Nacionale, Burim Pacollin.
“Aktualisht, organet e rendit janë duke zhvilluar hetime intensive në koordinim të plotë me Prokurorin e Shtetit. Për shkak të fazës së hershme të hetimit dhe me qëllim të ruajtjes së integritetit të procesit, në këtë fazë nuk mund të ofrohen detaje shtesë”, thuhej në njoftimin e Prokurorisë së Prishtinës më 02.03.2026.
Sot dy ditë më pas, Prokuroria e Prishtinës ka konfirmuar arrestimin e reperit, i cili përveç akuzave për dhunimin e gazetarit, akuzohet edhe për përdorim të narkotikëve.
Përveç sherrit fizik, gazetari dhe reperi më parë kishin patur edhe një përplasje online, që duket të ketë qenë zanafilla e përplasjes mes tyre, siç kanë treguar postimet e tyre të ditëve të fundit. Pacolli kishte postuar një video në Instagram ku ai shfaqej në një emision duke renditur disa prej “diss”-eve më të forta të reperëve shqiptarë.
