Policia e Beratit bllokon të gjitha rrugët drejt Malit të Tomorrit. Të bllokuar për orë të tëra jo vetëm kamionët e gurit por edhe mjete private e turistë. Pronarët e firmave akuzojnë Ministrin Klosi se po favorizon kryebashkiakun e Poliçanit.
Policia e Beratit ka bllokuar sot të gjitha rrugët që të çojnë drejt Malit të Tomorrit. Prej disa orësh,makina turistësh e vizitorësh si dhe kamionat e firmave të gurit janë të bllokuara në aksin Novaj-Tomorr dhe askush nga policia nuk jep asnjë shpjegim në lidhje me situatën e krijuar. Pronarët e firmave të nxjerrjes së gurit dekorativ në malin e Tomorrit,edhe pse kanë një muaj e gjysëm që kanë fituar gjyqin me qeverinë,VKM-ja e së cilës për shpalljen e Malit të Tomorrit “Park Kombëtar” u rrëzua nga Gjykata Administrative e Apelit Tiranë,vazhdojnë të pengohen nga policia për të vijuar punën.
Pronarët e firmave akuzojnë Ministrin e Mjedisit Blendi Klosi,duke deklaruar se në mal po punon vetëm gurorja që ai ka në pronësi me kryebashkiakun e Poliçanit,Adriatik Zotkaj. Ata deklarojnë se,mali i Tomorrit është blinduar nga forca të shumta të policisë së Beratit,Skraparit e Poliçanit,5 furgona të FNSH-së,forcat shqiponja,efektivë të qarkullimit rrugor dhe të krimit ekonomik. Firmat janë konfliktuar edhe sot verbalisht me policinë,duke u kërkuar urdhrin me shkrim se përse po bllokohen kamionët të punojnë në Novaj,por askush nuk jep shpjegim për situatën e krijuar.
g.kosovari
