“Radikalizimi” i qëndrimeve të opozitës, nga vendimi për protestë të pandalshme tek bojkoti i Kuvendit, duket se nuk po e shqetëson aspak mazhorancën. Madje dy krerët e koalicionit qeverisës, Rama e Meta nuk kanë ngurruar t’i ndajnë edhe me publikun momentet e tyre të relaksit.
Kryeministri ka postuar dje në mbrëmje një koment për fitoren e Juventusit ndaj Portos në përballjen e Champions League duke e shprehur hapur gëzimin dhe entuziazmin, por me një lapsus të vogël: rezultati ishte 0-2 dhe jo 2-0. E kjo për shkak se juventinët luanin në transfertë e jo në shtëpi.
Edhe Meta ka qenë dje në mbrëmje duke parë një ndeshje futbolli. Nga një foto e realizuar brenda shtëpisë së tij nga Ilir Kulla, Meta shfaqet tejet i qeshur dhe i relaksuar në krah të bashkëshortes, Monika Kryemadhi. Në sfond dallohet qartësisht se TV po transmeton një ndeshje futbolli, me gjasë Porto-Juventus.
E ndërkohë që mbrëmja për Ramën e Metën ishte kaq “sportive” dhe relaksuese, në anën tjetër kreu demokrat, Lulzim Basha po “ngjirej” para kryeministrisë dhe godinës së Kryesisë së Kuvendit duke përsëritur kërkesën për qeveri teknike si kusht për zgjedhje të lira e të ndershme.
MA.ME
