Kompanitë kineze të automobilave po tregojnë fuqinë e tyre duke prodhuar automjete luksoze me një çmim që evropianët mund ta përballojnë, duke sfiduar kështu hapur gjigandët e këtij sektori në kontinentin e vjetër.
Së fundmi kompania kineze Zeekr ka krijuar modelin SUV, Zeekr 9X , tepër luksoz, i cili po prezantohet këto ditë në Auto Show në Shangai.
Ajo çka tërheq vëmendjen është pamja e jashtme e kësaj makine që të kujton SUV-in luksoz të Rolls Royce Cullinan, me elementë të dizajnit që të kujtojnë grilën e Cullinan dhe shtyllën e tretë të saj në pjesën e pasme.
Megjithatë, Zeekr 9X, pavarësisht pranisë së tij, duket më pak i freskët dhe inovativ në krahasim me SUV-të luksoze evropiane, pasi i mungojnë veçoritë futuriste si dorezat e fshehura apo dyert e pasme që hapen me kokë poshtë.
Prania e Zeekr 9X në treg pritet të shkundë segmentin e SUV-ve luksozë, pasi është një model hibrid dhe mundë të arrijë shpejtësi nga 0 në 100 km/h, në afërsisht 3 sekonda. Edhe pse kompania nuk i ka konfirmuar plotësisht specifikimet teknike, 9X duket se ndjek formulën e suksesshme të kompanisë për automjetet elektrike ose hibride.
Zeekr 9X pritet të dalë në treg me çmime që fillojnë nga 60,000 euro në Kinë, gjë që e vendos atë në kategorinë premium evropian të SUV-ve edhe pse nuk prek luksin e Cullinan apo Range Rover.
