Pas plagosjes me armë zjarri mbrëmjen e djeshme në kryeqytet pranë gjimnazit “Partizani”, policia e Tiranës ka arrestuar Miklar Tolën, si autorin e plagosjes së aktorit Mishel Manokut. Uniformat blu bënë të mundur neutralizimin e 31-vjeçarit Tola në Kombinat.
Gjithashtu policia njofton se u arrestua edhe bashkëpunëtori i tij Ervin P, i cili e ndihmoi të largohej nga vendi i ngjarjes.
I plagosuri, aktori protagonist në filmin “Saimir”, kishte vetëm dy muaj që ishte liruar nga burgu, ku ishte dënuar me 4 vjet, pas një plagosjeje të kryer në vitin 2014.
Ngjarja
Më datë 20.07.2017, rreth orës 21:11, në numrin e Emergjencave 112, ka ardhur telefonatë për të shtëna me armë në afërsi të gjimnazit “Partizani”.
Në vendngjarje kanë mbërritur shërbimet e policisë dhe ambulanca.
Nga verifikimet paraprake ka rezultuar se në rrugën “4 Dëshmorët”, është gjendur një shtetas i shtrirë dhe i gjakosur i cili është transportuar në spitalin “Ushtarak”, ku ndodhet nën kujdesin e mjekëve.
Në vendin e ngjarjes janë sekuestruar gëzhoja të qitura nga armë e llojit pistoletë.
Janë ngrit pika kontrolli në hyrje dalje të zonës dhe vazhdon krehja e territorit.
Grupi hetimor po vazhdon punën për saktësimin e gjeneraliteteve të të plagosurit dhe zbardhjen e shkakut dhe rrethanave të ngjarjes.
a.ç
