Rreth 1000 banorë të 6 fshatrave në Vlorë, pritet që të shkojnë në Pallatin e Sportit të qytetit për të kaluar natën si pasojë e përmbytjeve.
Megjithatë shumica e tyre kanë preferuar të qëndrojnë nëpër shtëpi, raporton gazetari Enrik Mehmeti për BalkanWeb.
Ka qenë gjithashtu një numër i vogël qytetarësh që kanë nisur akomodimin e tyre pranë të afërmëve. Edhe pse tashmë janë marrë masat që të vendosen krevatë për të pritur qytetarët në nevojë, deri tani kanë preferuar të qëndrojnë në katet e tyre të dyta të shtëpive.
Ka nga ata që kanë vendosur thasë me rërë për të bllokuar prurjet e ujit. Vetë qytetarët i druhen ndonjë problem të mundshëm, si ndonjë vjedhje.
Pas një mbledhje të Shtabit të Emergjencës në Novoselë, ku mori pjesë edhe ministri Damian Gjiknuri, u mor vendimi që banorët, shtëpitë e të cilëve janë pranë lumit, të evakuohen për të shmangur ndonjë rrezik të pamenduar.
Në orët e natës pritet ai që është parashikuar si rreziku i madh prandaj këto shtretër janë vënë në gadishmëri për qytetarët.
