Dhomat e Specializuara të Kosovës në Hagë shpallën këtë të mërkurë vendimin ndaj liderëve të Ushtrisë Çlirimtare të Kosovës, duke dhënë në total 81 vjet burg për krime lufte.
Vendimi ka shkaktuar reagime të shumta, mes të cilave edhe atë të këngëtares së njohur Elvana Gjata.
Në një postim të publikuar në “Instastory”, Gjata e cilësoi vendimin si padrejtësinë më të madhe ndaj një populli që luftoi për mbijetesë. Ajo shprehet se sot ndien dhimbje për Kosovën, për njerëzit që sakrifikuan jetën, nënat që humbën fëmijët dhe familjet që humbën gjithçka.
Më poshtë vijon reagimi i plotë i Elvana Gjatës:
“Kjo është pa-Drejtësia më e madhe e bërë ndaj një populli që luftoi për mbijetesën! Për të drejtën për të lindur e rritur fëmijët në tokën vet, në gjuhën e vet, me kulturën dhe zakonet e veta!
MARRE!
Sot më dhemb Kosova. Më dhemb për ata që dhanë jetën, për nënat që humbën fëmijët, për familjet që humbën gjithçka dhe për një popull të tërë që luftoi jo për të marrë tokën e askujt, por për të mos u dëbuar nga e veta.
Liria e Kosovës nuk ishte dhuratë. U pagua shtrenjtë. Me jetë. Me gjak. Me dhimbje që ende sot jeton në mijëra familje.
Historia e një populli nuk mund të rishkruhet duke harruar pse ai u detyrua të luftonte.
UÇK-ja lindi nga nevoja për liri dhe mbijetesë.
Kosova është e lirë.
Dhe këtë të vërtetë nuk e dënon dot askush”.
