Shkon në 6-të numri i të dyshuarve për vrasjen e Aleksandër Bardhit, 47-vjeçarit nga Shëndelli i Sarandës që u gjet në një kanal më 25 shtator nga një i afërm pasi ishte qëlluar me automatik. Gjykata e Sarandës ka dhënë sot masën “arrest me burg” për dy të rinj, shok me njëri tjetrin, Dhimitër Cikon 21-vjeç dhe Amarildo Lamen 18-vjeç, arrestimi i të cilëve siç mëson “BalkanWeb” është bërë ditën e shtunë, ndonëse policia nuk e ka bërë publik.
Dy të rinjtë akuzohen për “vrasje me dashje në bashkëpunim” si dhe “armëmbajtje pa leje”. Po të njëjtat burime thonë se po kërkohet një person i 6-të si i përfshirë në vrasje, ndërkohë që 5 të tjerët ndodhen tashmë në paraburgim. Të akuzuar për vrasjen janë edhe 29-vjeçari Fernando (Florin) Deda dhe 15- vjeçari Gjergj Arapi dhe 38-vjeçari Eduard Gjonaj.
Viktima Aleksander Bardhi njihej nga policia si person me precedentë penalë, pasi rezulton të jetë dënuar më parë me 8 vjet heqje lirie, për plagosje të rëndë me dashje, ngjarje e ndodhur disa vite më parë në Mirditë. 47-vjeçari Aleksander Bardhi nuk e ka kryer dënimin, pasi duke qenë në kërkim, nuk është kapur nga policia dhe me vendim të Gjykatës së Lezhës në vitin 2011, i është parashkruar dënimi. Parashkrimi i dënimit konsiston në atë së për shkak të kalimit të afatit, i cili është paraparë me ligj, nuk mund të ndërmerret ndjekja penale dhe personit nuk mund ti shqiptohet dënimi për vepren penale që ka kryer.
Aleksandër Bardhi eshte vëllai i Petrit Bardhit, ish-kryeplak i Shëndellisë dhe ish-administrator i Kaçinarit në Mirditë. Petriti dhe vëllai tjetër i tyre Florian Bardhi njihen si persona që kanë pasur probleme me ligjin, kohë më parë ata janë arrestuar për trafik lëndësh narkotike. Një sasi e madhe droge, prej 424 kg kanabis u gjet në banesën e tyre në Sarandë, e cila dyshohet se kishte si denstinacion Greqinë. Petrit Bardhi rezulton i dënuar edhe më parë për veprën penale “dhënie ndihmë për kalim të paligjshëm të kufirit”. Në maj të vitit 2015 Petrit Bardhi u ndalua në Tiranë pasi iu gjet një pistoletë, por më vonë u vërtetua se ai kishte leje për mbajtjen e armës. Ndërsa në vitin 2013 kur mbante postin e kryetarit të komunës së Kaçinarit ai pati një përplasje me armë me policinë.
ma.me
