Të dyja anët e lumit të Lanës përgjatë segmentit nga Materniteti i Ri deri në Shkozë, do të kthehen në një minipark linear me mbi 3 mijë pemë. Bashkia e Tiranës ka rinisur nga ky segment, për vitin e katërt radhazi, aksionin e mbjelljeve për krijimin e Pyllit Orbital, që do të rrethojë kryeqytetin me një brez të gjelbër me 2 milionë pemë.
Kryebashkiaku shtoi se ky sezon përkon edhe me 75-vjetorin e Çlirimit të vendit nga pushtuesit nazifashistë, ndaj është një moment shumë i mirë që çdokush, sidomos kompanitë apo bizneset e ndryshme, të nderojnë sakrificën e atyre që luftuan dhe dhanë jetën për atdhe, duke mbjellë pemë.
“Synimi për këtë vit është pak më i lartë, por kemi edhe shumë sebepe: Kemi 17 nëntorin, pastaj 28-29 nëntorin, festimet për 75-vjetorin e Çlirimit. Është një moment për të kujtuar që, siç u çliruam nga një pushtues, tani duhet të çlirohemi nga të tjerë pushtues, si ndotja e ajrit nga makinat. Për të gjitha këto arsye, qoftë 75-vjetori i Çlirimit, qoftë 100 vjetori i Tiranës kryeqytet, është një arsye për çdo kompani të mbjellë nga 100 pemë; çdo shoqatë, shkollë, fakultet, universitet, të mbjellin nga 100 pemë”, vijoi ai.
Duke u ndalur tek projekti për lumin e Lanës, Veliaj deklaroi se ky projekt do të jetë po aq i suksesshëm sa edhe pjesa e parë e tij. Veliaj siguroi qytetarët e Tiranës për vijimin e projekteve të rëndësishme transformuese.
Deputetja e PS, Klotilda Bushka, vlerësoi angazhimin e Bashkisë së Tiranës dhe të qeverisë për transformimin e kësaj zone, duke përmirësuar tërësisht edhe jetesën e gjithë komunitetit.
g.kosovari
