Gentian Malindi, 42 vjeç, është personi në kërkim nga policia për 137 kilogramët e kokainës të kapura në kontenierë me banane në Portin e Durrësit.
Report Tv, raporton se ai ka qenë me dy të arrestuarit, Ardian Bega dhe Altin Mislihaka, të dy punonjës në portin e Durrësit, por i ka shpëtuar policisë pasi ka kuptuar se në pakot me kokainë mund të kishte GPS.
Dy oficerët e sigurisë kanë hyrë në kontenierë duke marrë disa pako me kokainë, më tej i kanë transportuar në një automjet me targa franceze ku ka qenë edhe Gentian Malindi.
Por ky i fundit kur ka parë se paketimi ishte ndryshe nga çfarë ishte kërkuar, ka kuptuar se po ndiqeshin nga policia, dhe ka mundur të arratiset. Në pranga përfunduan vetëm dy punonjësit e portit të Durrësit.
Sipas dëshmisë së dhënë nga një prej të arrestuarve, ata kanë hyrë në port nga ana e Urës së Dajlanit dhe kanë mundur të marrin disa nga pakot me drogë. Rruga e tyre ka vijuar drejt Shkëmbit të Kavajës, kur gjatë ecjes kanë kuptuar se diçka nuk shkonte.
Ishte pikërisht Gentian Malindi që kuptoi se në pakot e kokainës kishte edhe oriz. Sipas dëshmisë dhënë para oficerëve të Ardian Begës, Malindi u ka kërkuar të mos flasin pasi në automjet mund të kishte çip. Gentian Malindi ka qenë edhe më herët i arrestuar dhe proceduar për drogë.
g.kosovari
