Forcat ushtarake të SHBA-së kanë ndihmuar më shumë se 1.000 anije të kalojnë Ngushticën e Hormuzit që nga muaji maj
Komanda Qendrore e Shteteve të Bashkuara (CENTCOM) ka njoftuar se forcat e saj kanë ndihmuar rreth 1.000 anije tregtare të kalojnë në mënyrë të sigurt Ngushticën e Hormuzit që nga fillimi i muajit maj.
Sipas deklaratës, këto anije kanë transportuar rreth 500 milionë fuçi naftë brute përmes kësaj rruge strategjike detare.
Një zëdhënës i CENTCOM-it, duke folur për Al Jazeera, theksoi se forcat amerikane mbeten në gatishmëri të lartë dhe janë të gatshme të mbështesin anijet tregtare që dëshirojnë të kalojnë këtë ngushticë.
Ai theksoi se mbështetja vazhdon për të garantuar lëvizjen e lirë të trafikun ndërkombëtar detar.
Njoftimi erdhi si përgjigje ndaj pretendimeve të Gardës Revolucionare Islamike të Iranit (IRGC), e cila ka kërkuar që anijet ndërkombëtare të përdorin vetëm rrugët e përcaktuara prej tyre.
CENTCOM theksoi se Ngushtica e Hormuzit është ujë ndërkombëtar dhe se IRGC nuk ka asnjë autoritet për të diktuar rrugët e lundrimit. “Anijet tregtare vazhdojnë të përdorin ngushticën me mbështetjen e ushtrisë amerikane”, thuhet në deklaratë.
Ngushtica e Hormuzit, e vendosur mes Iranit dhe Omanit, është një nga pikat më kritike të tregtisë botërore të energjisë.
Në kohë paqeje, rreth 20 për qind e naftës së botës kalon përmes saj, duke e bërë thelbësore për furnizimin global me energji. Konflikti i zgjatur mes Shteteve të Bashkuara dhe Iranit ka ndikuar ndjeshëm në trafikun detar në këtë zonë, me sulme të raportuara mbi anije tregtare dhe masa ushtarake nga të dyja palët.
Që nga fillimi i majit, forcat e CENTCOM-it kanë ofruar mbështetje përmes komunikimit, koordinimit dhe mbrojtjes për të lehtësuar kalimin e anijeve. Kjo ndihmë është bërë e nevojshme për shkak të kërcënimeve dhe përpjekjeve për sulme ndaj anijeve tregtare dhe marinëve të pafajshëm.
Situata mbetet e tensionuar. Forcat amerikane vazhdojnë të monitorojnë zonën dhe të jenë të gatshme për të garantuar lirinë e lundrimit, duke nënvizuar se rruga mbetet e hapur për trafikun ndërkombëtar ligjor.
Ekspertët theksojnë se çdo ndërprerje e zgjatur e trafikun në Hormuz do të kishte pasoja të mëdha për tregjet globale të energjisë dhe ekonominë botërore.
