ICITAP, në bashkëpunim me policinë e Nju Xhersit dhe Gardës Kombëtare të Nju Xhersit, kanë sponsorizuar kursin 1-javor për njësinë Antieksploziv në Policinë e Shtetit, për përdorimin e robotit kundër mjeteve të improvizuara shpërthyese, në mënyrë që të forcohet aftësia e tyre reaguese dhe sigurimi i punonjësve të policisë gjatë procedurave të çaktivizimit.
Siç raporton News 24, ambasada amerikane, policia e Nju Xhersit dhe Gardës Kombëtare të Nju Xhersit krahas trajnimit të zhvilluar për ekspertët e njësisë Antieksploziv, i kanë dhuruar kësaj njësie 2 robotë antieksplozivë, si dhe rreth 131 jelekë antiplumb për punonjësit e policisë së repartit RENEA. Drejtori i Policisë së Shtetit, Haki Çako, si dhe zv/ambasadori amerikan, Z.David Muniz, kanë vlerësuar si mjaft të shkëlqyera marrëdhëniet ndërmjet Policisë së Shtetit, ambasadës amerikane dhe programit ICITAP, që ka asistuar Policinë e Shtetit. Çako ka vlerësuar ndihmën dhe kontributin e dhënë nga ambasada amerikane dhe programi ICITAP në çdo fushë të policimit nëpërmjet trajnimeve për ngritjen e kapaciteteve, por edhe të donacioneve të dhuruara, tepër të vyera për punën e tonë. Zv/ambasadori amerikan, Z.David Muniz, në emër të SHBAve, ka rikonfirmuar edhe një herë mbështetjen e plotë edhe në të ardhmen për Policinë e Shtetit. Në fund të ceremonisë u bë shpërndarja e certifikatave për përfundimin e kursit për 20 efektivë të njësisë Antieksploziv të repartit RENEA.
