Kur ka kaluar rreth një vit nga nisja e operacionit kombëtar “Forca e Ligjit”, autoritetet ligjzbatuese shqiptare duket se janë drejt përmbushjes së gjysmës së objektivit të tyre.
Nga 41 grupe kriminale të skeduara, 19 janë goditur në 19 operacione dhe janë arrestuar 130 persona
Zëvendës/Ministrja e Brendshme, Rovena Voda, e ftuar në një intervistë në Ora News foli edhe për 19 milion euro pasuri kriminale të sekuestruara.
“Operacioni “Forca e Ligjit” do të vazhdojë jo vetëm për disa muaj por edhe më gjatë. Që në fillim kur u strukturua si ide “Forca e Ligjit” u skeduan 41 grupe kriminale që vepronin në gjithë territorin. Me goditjen e fundit të grupit Bajri në Shkodër numri ka arritur në 19. Kemi 19 operacione të suksesshme. 130 persona të arrestuar dhe 19 milion euro të sekuestruara. Këtu futen llogari bankare dhe pasuri të paluajtshme. Në operacionin e fundit ku u godit grupi Bajri patëm sekuestrimin e një hotel resorti në Velipojë, disa dyqaneve, makinave që kapin shumë e disa milionë euro. Jemi afër gjysmës së atij qëllimi final që operacioni “Forca e Ligjit” të jetë i sukseshëm”, deklaroi Voda
Duke mbetur tek operacioni i fundit në Shkodër, Voda shpreson për kapjen shumë shpejt edhe dy personave të shpallur në kërkim si pjesë e grupit kriminal “Bajri”
“Bashkëpunimi midis Agjencive ligjzbatuese shqiptare por dhe atyre jashtë territorit të Shquipërisë, kryesisht të shtetit holandez mendoj se do të kemi një finalizim të suksesshëm të këtij operacioni edhe me kapjen e dy personave në kërkim” deklaroi Voda
Numri dy i Ministrisë së Brendshme foli për bashkëpunim të mirë me prokurorinë ndërsa lidhur me gjyqësorin shprehu rezerva për lirimin e të arrestuarve.
“Lidhur me operacionin “Forca e Ligjit” nuk është se ka qenë në disporporcion numri i arrestuarve me atë që gjykata ka lënë jashtë. Nuk na vjen mirë që persona që arrestohen gjykata i liron për ti hetuar në gjendje të lirë.Me prokuroritë në rrethe dhe atë të krimeve të rënda marrëdhënien e kemi shumë të mirë. Gjykata është tjetër.Gjyqtari vendos mbi bazën e provave por është i pavarur dhe ka dhe bindjen e tij subjektive” deklaroi Voda
a.ç
