Sonte, në orën 19:00 në Hotel Tirana International prezantohet “Këshilli i Medias”, një organizim i pavarur i gazetarëve shqiptarë që ka si qëllim rritjen e standardit profesional të gazetarisë në Shqipëri përmes nxitjes sër espektimit të Kodit të Etikës së Medias nga organizatat e shtypit, medias audiovizive dhe atyre të internetit në vend.
Kjo nismë e mbështetur nga Këshilli i Europës, ka në fokus përfaqësimin e interesit qytetar, edukimin e gazetarëve, botuesve dhe stafeve vendimmarrëse në media me parimet e etikës në media, ruajtjen dhe përmirësimi e lirisë së shprehjes dhe informimit, si dhe rritjen e lirisë dhe pluralizmit të medias.
Nismëtarë të kësaj përpjekjeje për adresimin e disa problemeve evidente në mediat shqiptare sot janë gazetarë praktikues të profesionit me përvojë të gjatë në degë të ndryshme të gazetarisë, duke përfshirë shtypin e shkruar, radio-televizionin dhe gazetarinë online.
Ndër themeluesit e “Këshillit të Medias” janë Armand Shkullaku, Marin Mema, Desada Metaj, Koloreto Cukalli, Aleksandra Bogdani, Blendi Salaj, Sokol Shameti, Alfred Lela, Beti Njuma, Arben Muka, Besar Likmeta, Habjon Hasanaj, Kozeta Kurti, Gjergj Erebara etj.
“Këshilli i medias” nuk përmban preferenca apo mospëlqime politike por ka synim të vetëm fuqizmin e pushtetit të katërt, si një garantues të një shoqërie demokratike të informuar saktë dhe pa anësi.
