Partia Demokratike e Rithemelimit kërkon sqarim nga gjyqtarja që po heton çështjen “Partizani”, duke e akuzuar atë se është e korruptuar dhe se ka fshehur dënimin e saj.
Me anë të një deklarate thuhet se Irena Gjoka po hesht si fija e barit, ndërsa e paralajmëron atë se do përballet me të vërtetën.
Sipas Rithemelimit, gjyqtarja ka fshehur vendimin e denimit për arsye korrupsioni dhe marrja përsipër e gjykimit ndaj Sali Berishes, e vendosin atë qartazi në pozitat e konfliktit të interesit.
“Prej disa javësh gjyqtarja Irena Gjoka mban pezull vëmendjen publike me disa qëndrime që nuk i bëjnë nder gjyqësorit dhe as figurës së gjyqtarit.
E denoncuar nga avokati Genc Gjokutaj dhe të tjerë se është shkarkuar nga ish Presidenti Sali Berisha në vitin 1996 kur mbante detyrën Kryetarit të Këshillit te Lartë të Drejtësisë, ajo hesht si fija e barit.
Opinioni publik kërkon të informohet mbi këtë fakt dhe mbi të gjitha, nëse kjo e vendos gjyqtaren Gjoka në pamundësinë për të drejtuar procesin ndaj Kryetarit të opozitës shqiptare, për shkak të konfliktit të interesit.
Por këto pyetje nuk mbeten me kaq:
A është identifikuar dhe trajtuar shkarkimi gjatë proçesit të vetingut të gjyqtares?
Nese jo, pse ka ndodhur kjo perzgjedhje selektive?
A ka qënë korrupsioni arsyeja e shkarkimit?
Në cilën datë ka ndodhur shkarkimi?
A ka patur të tjerë të shkarkuar me të njëjtën akuzë dhe cilët janë?
A do të plotësoheshin kriteret e vlerësimit profesional në rast të një shkarkimi për arsye korrupsioni? Me pak fjalë, a do të ishte sot ajo duke ushtruar pozicionin e gjyqtares nëse ky shkarkim do të ishte bërë publik?
Pse nuk u tërhoq ajo qe ne fillim kur mbrojtja e z.Berisha ia dha këtë mundësi?
Firmosur nga ish Kryetari i KLD-së , fshehja e vendimit të shkarkimit për arsye korrupsioni nga gjyqtarja Gjoka dhe marrja përsipër e gjykimit ndaj Kryetarit të opozitës, e vendosin atë qartazi në pozitat e konfliktit të interesit. Një konflikt interesi i cili dëshmon karakterin politik të këtij gjyqi dhe që nxjerr në pah arsyet e vërteta pas vendimmarrjeve antikushtetuese e antiligjore të gjyqtares Gjoka.
Ngulmimi i gjyqtares për të mos u tërhequr shpjegon garancitë që ka marrë nga porositësit e ‘gjahut të shtrigave’, procesit politik kundër Sali Berishës dhe Jamarbër Malltezit.
Kur faktet të shpalosen publikisht, gjyqtarja e korruptuar që ka korruptuar edhe sistemin duke fshehur dënimin, do të përballet jo vetëm me të vërtetën por edhe me ata që e kanë mbrojtur politikisht.
E vërteta mund të kamuflohet, por në fund ajo triumfon”, thuhet në reagim./m.j
