Komisioneri europian i zgjerimit Hahn ka zbritur në Tiranë, ndërkohë që kantieri i bashkisë tek Liqeni dhe zallamahia që u konsumua rreth tij, vazhdojnë të jenë lajmi kryesor i politikës shqiptare. Që do të thotë, me fjalë të tjera, se në momentin që Hahn erdhi në kryeqytetin shqiptar, fabula qëndrore e politikës shqiptare nuk ishte reforma e madhe e drejtësisë, por… një kopësht fëmijësh.
Megjithatë Hahn nuk e la pa konsumuar listën e mesazheve që kishte sjellë me vete nga Brukseli. Mes tyre spikasin së pari prognoza pozitive që ai i bëri perspektivës së hapjes së negociatave mes Shqipërisë dhe Bashkimit Europian. Dhe së dyti, një mesazh i fortë ishte edhe për frymën kosntante të konfliktit që egziston në rradhët e klasës tonë politike.
Hahn tha se hapi i rradhës në marrëdhëniet mes vendit tonë dhe BE është raporti i pozitiv i progresit për Shqipërinë brenda vitit dhe pas këtij momenti, hapja e negociatave për anëtarësim të vendit tonë në Bashkimin Europian. Një vizion i qartë dhe i thjeshtë i shefit të zgjerimit të BE, i cili ndjek korsinë e vjetër të avancimit të statusit të Shqipërisë, krahas kryerjes prej saj të një numri reformash. Nga të cilat, e këtu vijon mesazhi i dytë i komisionerit Hahn, reforma në drejtësi mbetet kusht bazë.
Për pasojë, komisioneri e pa të udhës t’i drejtohet opozitës shqiptare, me qëllim që ajo të zbusë dhe modifikojë gjuhën e presioneve dhe të kushtëzimit të reformës. Me elegancë Hahn e konsideroi një çeshtje të gjyqësorit atë që kërkon sot opozita e djathtë, duke bërë apel që problemet anësore të mos bëhen pengesë për avancimin e shpejtë të draftit të reformës, drejt votimit të plotë në parlament.
Mesazhet e Hahn janë në sinkron me linjën konstante të BE për më shumë bashkëpunim politik në Shqipëri dhe për evitimin e frymës së konfliktit në dëm të reformave. Mirë e ka komisioneri, po kujt i foli?!
