Bashkimi Evropian duhet të qëndrojë si një trup i vetëm në përgjigjen e tij ndaj krizës migratore, thanë sot zyrtarë të lartë të unionit duke shprehur njëkohësisht shqetësimin për një krizë të mundshme humanitare, që kërkon përgatitjet e duhura.
“Ne jemi të shqetësuar rreth zhvillimeve në të ashtuquajturën ‘rruga ballkanike’ si edhe për krijimin e një krize të mundshme humanitare që mund të shfaqet në disa vende, sidomos në Greqi”, thanë në një deklaratë të përbashkët eurokomisioneri për Migrimin, Dhimitris Avramopulos dhe ministri holandez i Migracionit, Klaas Dijkhoff, vendi i të cilit ka presidencën e radhës të unionit.
“Ne u kërkojmë të gjitha vendeve dhe zyrtarëve për të përgatitur planet e nevojshme për të qenë në gjendje të përballojnë nevojat humanitare”, shtuan ata.
“Të gjitha vendet anëtare duhet të veprojnë me një frymë të përbashkët solideritati dhe përgjegjësie, sidomos në këto kohëra kur bashkimi dhe zgjedhjet e përbashkëta janë të domosdoshme”, theksuan zyrtarët.
”Ekzekutivi evropian është i shqetësuar që disa vende anëtare po veprojnë ndryshe marrëveshjeve të arritura. Ne besojmë se vendet tona duhet të punojnë së bashku dhe jo kundër njëri-tjetrit”, tha nga ana e saj zëdhënësja e ekzekutivit evropian, Natasha Bertaud.
