Durrësi ka hyrë zyrtarisht në sezonin veror.
Temperaturat e larta që kanë shoqëruar ditët e fundit të majit kanë sjellë një fluks të konsiderueshëm pushuesish në bregdet, duke mbushur plazhet e Adriatikut.
Mes vizitorëve vendas nuk mungojnë as turistët e huaj, të cilët kanë zgjedhur qytetin bregdetar të Durrësit si destinacion të parë për të kaluar disa ditë pushimi pranë detit.
“Po qëndrojmë në Tiranë dhe sot erdhëm për herë të parë në Durrës për të bërë plazh. Deri tani gjithçka na ka pëlqyer shumë dhe me siguri do të rikthehemi për pushime në Shqipëri”, tha një turist nga Italia.
“Jam nga Ukraina. Në Durrës është shumë bukur. Ka plazhe të mrekullueshme dhe njerëz shumë të këndshëm. Është dita ime e parë këtu dhe po kaloj shumë mirë. Do të vij përsëri, sepse më pëlqen Shqipëria dhe prej pesë vitesh e vizitoj për pushime”, tha një turiste nga Ukraina.
“Vij nga Roma. Durrësi është një vend shumë i këndshëm dhe më pëlqen shumë. Kjo është hera e pestë që vij këtu. Ish e fejuara ime ishte nga Durrësi, edhe pse rrugët u ndamë, unë vazhdoj ta frekuentoj këtë qytet sepse më pëlqen. Për momentin, gjithçka duket në rregull”, u shpreh një turist tjetër italian.
Edhe këtë sezon veror, Durrësi mbetet ndër destinacionet më të preferuara për pushuesit, falë vijës së gjatë bregdetare, afërsisë me kryeqytetin dhe ofertës së larmishme turistike.
Me afrimin e muajit qershor, pritet që fluksi i vizitorëve të rritet edhe më tej, duke hyrë gradualisht në ritmin e plotë të sezonit veror.
