Zëdhënësi i Partisë Demokratike të Kosovës, Blerand Stavileci, në një lidhje direkte me studion e “Off the Record” më Andrea Dangllin, në A2 CNN, deklaroi se PDK-ja po rikthehet fuqishëm.
“Rezultatet që kemi mbledhur nga terreni dhe që po konfirmohen nga KQZ-ja janë më shumë sesa inkurajuese. Një rikthim i fuqishëm i subjektit tonë që bëri fushatë të jashtëzakonshme që po kurorëzohet me rezultate edhe më të jashtëzakonshme”, deklaroi Stavileci.
“Pas 50% të votave të numëruara, kemi pothuajse 30%, që është rritje e konsiderueshme e subjektit tonë politik. Kosova mundet dhe duhet të bëjë më mirë dhe kjo sot u konfirmua”, shtoi më tej zëdhënësi i PDK-së.
Sipas tij, “PDK-ja nuk vendos vija të kuqe në negociata për qeverinë”, por shtoi se kryeministri Albin Kurti “ka bërë dëme pothuajse të pariparueshme” në politikën e jashtme.
“Populli e ka kuptuar më së miri këtë dhe e ka ndëshkuar me votë. PDK është partia me rritjen më të madhe”, shtoi Blerand Stavileci.
