Ismail Morina – Ballisti, ‘heroi’ i ndeshjes Shqipëri – Serbi, ka nevojë që bashkëatdhetarët e tij, sot më shumë se kurrë, t’i kthejnë ‘borxhin’ dhe ta ndihmojnë. Në një intervistë të bërë për Digitalb, Morina foli për jetën e tij dhe gjithë çfarë ka ndodhur pas ngritjes së flamurit shqiptar mbi stadiumin serb.
Ballist Morina, që nga tetori i vitit të kaluar nuk ka qëndruar më shumë se 1 javë me familjen e tij në Itali, madje ka lënë edhe punën për shkaqe sigurie. Nga ana tjetër ai ka një kredi të majme për të paguar të shtëpisë së tij dhe e ka shumë të vështirë të menaxhojë gjithë këto shpenzime me aq pak fitime sa ka, raporton Shqiptarja.com.
“Deri tani jemi munduar që t’ia dalim me kursimet që kishim lënë mënjanë për të realizuar një ëndërr timen”, ka thënë Morina.
I pyetur se cila është ëndrra e tij, Morina ka thënë: “Të blej një vinç. Është e vetmja punë që bëj me qejf dhe e bëj mirë. Kisha kursyer para për ta realizuar këtë ëndërr mirëpo që nga dita e dronit nuk kanë shkuar mirë shumë gjëra në aspektin personal”, ka thënë Morina.
Pas kësaj interviste, në rrjete sociale ka filluar nisma për të ndihmuar Ballistin. Eshtë hapur një lllogari bankare ku të gjithë mund të kontribuojë me sadopak para, që ëndrra e tij të bëhet realitet.
