Nikoll Nikollaj është baba i gjashtë fëmijëve, një prej të cilëve është Rudolfi 34 vjeçar. Ai tregon se djali prej kohësh ankohek se po e ndiqnin disa njerëz, por për të atin kjo ishte një sajesë në kokën e të birit.
Babai shton se i biri nuk ndalej në bindjen e tij, por për më tepër avancoi duke akuzuar familjen se po i bënin puç.
Një ditë të shtatorit 2020, tregon babai, duke përsëritur teorinë e puçit, Rudolfi iu sul me thikë në dorë që ta godiste. Madje arriti ta lëndojë në krah.
Duke parë se ç’e priste, babai u detyrua të hidhet nga ballkoni i katit të dytë të shtëpisë ku jetonin. Më pas kishte frikë të kthehej në shtëpi dhe atë natë fjeti në një hotel.
Të nesërmen mori takim me një punonjës policie dhe që të dy shkuan në banesë dhe morën Rudolfin me një autoambulancë duke e shtruar tek spitali Psikiatrik nr. 5.
Rudolfi qëndroi një muaj në spital dhe kur doli merrte ilaçe, por disa ditë më vonë babai e kuptoi se ai nuk po i pinte më.
Kjo shkaktoi nisjen e problemeve dhe Rudolfi e gjente zgjidhjen te dhuna me thikë. Një ditë ai sulmoi me thikë një shokun e tij, M.L. duke e plagosur.
Më tej, kreu dhe një tjetër plagosje me thikë, atë të shtetasit R.K., në terminalin e autobusëve.
Rudolfi u rishtrua në spital dhe para dy javësh doli që andej. Sërish e njëjta histori, ilaçe që nuk piheshin më dhe me pasojë daljen nga kontrolli derisa dje, kreu sulmin masiv te xhamia Dine Hoxha në rrugën e Kavajës në Tiranë.
Tani, mbi 34 vjeçarin Rudolf Nikollaj rëndon akuza e veprave me qëllime terroriste. I dyshuari ka pranuar krimin e ndodhur te xhamia, duke thënë se kishte kryer krimin pasi kishte krijuar bindjen se disa njerëz që sipas tij ishin besimtarë myslimanë, e ndiqnin sa herë dilte nga shtëpia.
“Ata më përndjekurit gjithë kohës në shtëpi. Dhe kur dal nga shtëpia më ndjekin nga pas, më shohin por nuk më flasin”, ka thënë i dyshuari.
Më tej 34 vjeçari ka thënë se ai i njeh personat që thotë se e përndjekurit, nuk ua di emrat por po ti shohë mund ti identifikojë.
