Në një takim të zhvilluar në Athinë, Flamur Noka Sekretari i Përgjithshëm i Partisë Demokratike kërkoi mbështetje nga emigrantët shqiptarë në Greqi, duke theksuar rëndësinë e votës së tyre në zgjedhjet e 11 majit.
Ai premtoi një program që do të zhdukë varfërinë dhe mjerimin në Shqipëri brenda 100 ditëve të para të qeverisjes, duke e cilësuar votën e diasporës si një barrikadë për krimin dhe korrupsionin.
“Më 11 maj do të jeni ju, diaspora jonë që do të ndryshoni dhe shpëtoni vendin tuaj. Ju do ta bëni këtë me votën dhe vullnetin tuaj. Më 11 maj vota juaj do të jetë barrikadë për krimin dhe korrupsionin dhe do të frenojë rrëshqitjen drejt greminës së vendit tonë. Ju me votën tuaj do të bënit të mundur kthesën, do të bëni të mundur që Shqipëria të ngrihet dhe të kthehet në rrugën Evropiane.
Ne kemi njohje të situatës në Shqipëri, por edhe të shqiptarëve të Greqisë. Ne kemi punuar për ti dhënë zgjidhje halleve dhe problemeve të shqiptarëve. Angazhimi i forcës tonë politike me një program të qartë për shqiptarët do ta zhdukë varfërinë dhe mjerimin ndërshqiptar për 100 ditët e para të qeverisë. Programi ynë do ti japë zgjidhje plagëve të krimit dhe korrupsionit. Programi i PD është shpëtimi për Shqipërinë dhe shqiptarët, u shpreh Noka.
