“Isha për një sërë kallëzimesh”, u shpreh Flamur Noka pasi doli nga ambientet e SPAK.
Pjesë nga deklarata për mediat:
Flamur Noka: Krimi elektoral është ai që sot ka vendosur mbi fatin e votës së shqiptarëve.
Janë dhjetëra raste kallëzimesh dhe referimesh që PD dhe opozita ka paraqitur në SPAK, duke nisur që nga Durrësi, Vora, Elbasani, Shkodra, Fieri, Vlora dhe gjithë Shqipëria.
Paraqitët ndonjë provë?
Flamur Noka: Ne nuk kemi organi hetimor, organi hetimor presupozohet të ishte ky këtu mbrapa.
Për cilin kallëzim konkret ishit?
Flamur Noka: Isha për një sërë kallëzimesh që lidhen vetëm me krimet zgjedhore. Konstatova që task forca për krimet zgjedhore kishte vdekur ditën që u krijua.
SPAK ju ka dërguar dy shkresa dhe kërkon informacion nga ana juaj mqs jeni firmëtar i kontratës lobuese në një kompani në SHBA dhe kërkon informacion. A i jeni përgjigjur ju Prokurorisë dhe i keni vendosur në dispozicion materialet?
Flamur Noka: Ne jemi PD, jemi forcë demokratike, transparente, Çdo gjë e kemi vendosur në dispozicion, s’kemi gjë për të fshehur, është ligjore.
Deputeti i PD-së mbërriti në Prokurorinë e Posaçme rreth orës 10:20 dhe doli pas gati 1 ore.
Noka ka përfunduar në dyert e SPAK pas kallëzimeve ndaj tij për pastrim parash, apo edhe shpifje. Kujtojmë që në maj 2024, SPAK nisi zyrtarisht hetimet pasurore për Nokën dhe familjen e tij.
Ndërkohë, një punonjës i burgut të Peqinit, Gjergji Vishkuli, të cilin sekretari i përgjithshëm i PD-së e akuzonte publikisht në grupin e policëve që sipas tij bënte fushatë më 11 maj për Partinë Socialiste, e kallëzoi për shpifje dhe fyerje.
