Kryeministri Edi Rama ishte i pranishëm këtë të hënë në qytetin e Shkodrës, në kuadër të 35-vjetorit të Partisë Socialiste. Takimi u zhvillua në Kalanë e Rozafës.
Gjatë fjalës së tij, Rama, ndërsa falënderoi pjesëmarrësit e shumtë në numër, ironizoi kundërshtarët, duke theksuar se do ta akuzojnë se po përdor administratën dhe patronazhistët.
“Kur po ngjiteshim rrugicave të kalasë për të ardhur deri këtu, ndërkohë po më thoshin Enea dhe Beneti se ka shumë njerëz. Thashë: a po thonë çfarë dëshirojnë apo çfarë është në realitet? Thashë, nëse shumë njerëz kanë rezistuar kaq shumë deri në ngjitje, jo se jemi të fortë, por jemi më të fortë se asnjëherë tjetër.
Nuk diskutohet se do na hidhen në fyt menjëherë “Flamingot” që do të thonë se patronazhistët janë mbledhur atje, administrata është mbledhur atje. Ju falënderoj shumë dhe çmoj mundimin për t’u ngjitur deri këtu së bashku. Ngjitje që ka qenë jo e lehtë, por po të marrësh parasysh se nga e kanë nisur ata që themeluan PS në Shkodër, nuk kemi më asnjë arsye për t’u ankuar për vështirësitë, por i kemi të gjitha arsyet për t’u ngjitur në majën që na kanë lënë amanet rilindasit tanë dhe aty ku ua kemi borxh fëmijëve tanë, në BE”, tha Rama.
