Humbja kundër Anglisë tri ditë më parë në Londër duhet harruar dhe tanët duhet të bindin me lojë dhe pikë kundrejt një rivali që dominojnë në letër dhe histori. Andorra vjen nga humbja 0-1 në shtëpi kundër Letonisë dhe tanët duhet të tregojnë forcën për të marrë maksimumin, kusht ky që do i bënte kuqezinjtë pretendentë për kalimin e grupit.
Emrat e lënë jashtë – Simon Simoni, Andi Hadroj dhe Etnik Brruti do e ndjekin sërish ndeshjen nga tribunat e stadiumit. Në bazë të rregullores së UEFA-s, Sylvinho do duhet të ketë të gatshëm vetëm 23 futbollistë për ndeshje, me tre emrat më sipër që janë të sakrifikuarit.
Duke qenë se trajneri kishte në grumbullim 26 lojtarë, një lëvizje e tillë ishte e pashmangshme. Bie në sy se edhe ish-kapiteni i Kosovës U-21, Etnik Brruti i cili u afrua me zhurmë te kuqezinjtë mbetet sërish jashtë për ndeshjen e dytë, pasi të njëjtët e ndoqën ndeshjen nga tribunat e ‘Wembleyt’ kundër Anglisë.
Historia – Mes dy skuadrave janë luajtur shtatë përballje në histori, ndërsa numërohen pesë fitore për kuqezinjtë, një barazim dhe një humbje. Fitorja e parë ka qenë një ndeshje miqësore në vitin 2000, ndërsa më pas u mposhtëm në Andorrë me rezultatin 2-0.
Sërish ishte një miqësore në 2010 që pa Shqipërinë fituese, ndërsa dy ndeshjet kualifikuese të Europianit 2020, ekipi ynë fitoi në transfertë 0-3, ndërsa ndeshja në shtëpi përfundoi në barazim 2-2. Dy duelet e fundit për kualifikueset e Botërorit 2022 panë Shqipërinë që të triumfonte, të dyja me rezultatin minimal 1-0.
Formacioni – Pesë dilema ka Sylvinho nga ndeshja e fundit kundër Anglisë dhe gjithçka lidhet me mesin e fushës dhe sulmin, teksa do ketë ndryshime në emra dhe skemë. Duket se mbrojtja nuk do ndryshojë dhe skema do kalojë në 4-3-3, nga 4-2-3-1.
Medon Berisha mund të marrë vendin e Ramadanit, Pajaziti atë të Bajramit, Muçi dhe Hoxha kanë një balotazh për krahun e majtë të sulmit, teksa Broja mund të spostohet në krah në vend të Asanit. Manaj pritet në majën e sulmit në vend të Uuznit që e nisi titullar në Londër. Në portë duket se Strakosha ka kaluar problemet që shfaqi kundër Anglisë, aty ku u zëvendësua nga Kastrati.
Ndeshja gjykohet nga austriaku Sebastian Gishamer.
Formacioni i mundshëm:
Shqipëria (4-3-3): Strakosha; Balliu, Ajeti, Gjimshiti, Aliji; Asllani, Ramadani (Berisha), Bajrami (Pajaziti); Asani (Broja), Muçi (Hoxha) Manaj. Trajner: Sylvinho
