Fitorja e kandidatit të ASHE-së Vangjush Dako për të tretën herë në krye të bashkisë së Durrësit, për deputetin e PR Agron Duka ka ardhur pas blerjeve të votave.
Në një prononcim për gazetën “Panorama”, Duka tha se rezultati i Dakos me një shifër rekord, rreth 13700 vota përpara kundërshtares Grida Duma, ka ardhur pas blerjes masive të votave.
“Përballë kësaj blerjeje masive të votave, edhe unë nuk kisha se çfarë t’i bëja Vangjush Dakos. Në Bashkinë e Durrësit janë përdorur të gjithë mënyrat e mundshme për të tjetërsuar vullnetin e votuesit. Me këtë proces që ka ndodhur tani, dëshmohet fakti se nuk ka më zgjedhje,” tha Duka për Panoramën.
Sipas tij, PD nuk kishte defekte gjatë funksionimit dhe Duma bëri një fushatë të shkëlqyer.
“Por të fitojë Vanjgush Dako, me gjithë ato dëme që i ka shkaktuar Durrësit, kjo është çudia më e madhe që ndodh vetëm në Shqipëri,” tha ai.
I pyetur nëse do kandidonte vetë ai, do kishte një rezultat ndryshe, Duka tha: “Nuk do kishte asnjë efekt përballjë kësaj blerjeje masive në çdo krah. Me se t’i motivonte njerëzit Grida, kur tjetri përballë blinte gjithçka”.
