Palermo fitoi 3-2 kundër Veronës në javën e fundit të Serisë A, duke siguruar mbijetesën. Ishte një ndeshje tepër e rëndësishme dhe tifozët nuk lanë gjë pa bërë në prag të saj, duke kryer të gjitha ritet fetare të nevojshme dhe në fund fitorja duket se ishte vërtet “hyjnore”.
Një foto e bërë pesë minuta para fillimit të ndeshjes, e cila shfaq Curva Nord të stadiumit “Renzo Barbera”, tregon mbi të një dritë në formë njeriu.
“Është Santuzza, është Santa Rosalia” thonë tifozët. “Erdhi që të na shpëtojë”.
Santa Rosalia, e njohur edhe si La Santuzza, është shenjtorja mbrojtëse e Palermos, qyteti ku u lind më 1130.
Efekti optik ushqen besimin se Santa Rosalia ishte vërtet aty për të mbrojtur Palermon. Verona goditi dy shtylla dhe tifozët janë të bindur se “ishte fryma e Santa Rosalias që e devijoi dy herë topin për të shpëtuar portën”.
D.I.
