BMI Research është një kompani e specializuar në analizat ekonomike, që zotërohet nga gjigandi financiar Fitch.
Në një raporti të posaçëm risku për Shqipërinë, ajo vlerëson se vendi ka shënuar progres, por këtë vit do të përballet me teste të rëndësishme.
“Shqipëria ka shënuar progres në adresimin e sfidave politike gjatë dy viteve të fundit, por testi i vërtetë do të vijë kur vendi të shkojë në zgjedhjet e 18 qershorit”, thotë raporti.
Sipas kompanisë, zgjedhjet përbëjnë sfondin e një prej dy rreziqeve më të mëdha me të cilat do të përballet ekonomia e vendit.
“Ndërsa kriteret e anëtarësimit në BE do të jenë një ankorë e rëndësishme për politikat, pavarësisht se kush i fiton zgjedhjet, rreziku i regresit është ndoshta më i madh nëse opozita fiton pushtetin”, nënvizon raporti.
Ndërsa kërcënimi i dytë më i madh, sipas BMI, buron nga ambienti i jashtëm. “Një tronditje e ekonomisë greke ose asaj italiane në vitin 2017 do të godiste Lekun. Kjo mund të çojë në rritje të inflacionit, duke rrezikuar konsumin privat”, thekson raporti.
Sipas BMI, ekonomia shqiptare nuk do të përfitojë nga situata më e mirë ekonomike që po kalon Europa, për shkak se është e ekspozuar ndaj dy ekonomive më të dobëta, Greqisë dhe Italisë.
Por kërkesa e brendshme do të qëndrojë e fortë, duke e mbajtur Shqipërinë mes ekonomive me rritjen më të shpejtë në rajon për dy vitet e ardhshme./top-channel
c.a
