Dy emra të njohur të Drejtësisë janë përzënë sot nga sistemi. Bëhet fjalë për Artan Brocin dhe Dritan Rreshkën.
Komisioni i Pavarur i Kualifikimit i gjeti me shkelje sa i përket deklarimit të pasurive të gjyqtarit Broci dhe prokurorit Rreshka. Artan Broci, me detyrë anëtar i Gjykatës së Lartë, ka rezultuar me mospërputhje çmimesh për një apartament që ka blerë dhe ka shmangur taksat.
Nga ana tjetër, Kryeprokurori i komanduar i Tiranës, Dritan Rreshka nuk justifikon dot pasurinë me burime të ligjshme. Në raportin e paraqitur nga ILDKPKI, rezultonte se prokurori ka fshehje të pasurisë.
Dy kate të një shtëpie 131 metra dhe 166 metra me vlerë 2.5 milionë lekë, kanë si burim të deklaruar pasurie, paratë në emigracion dhe kreditë për të cilat ka mospërputhje të deklarimit dhe vlerës së kostos së kateve të shtëpisë.
Problemi i dytë me pasurinë e Rreshkës është blerja e disa obligacioneve me vlerë 7.9 milionë lekë për të cilat rezulton se nuk ka pasur burime të mjaftueshme financiare.
/a.m.
