Anëtarët e FIFA-s të premten pritet ta zgjedhin presidentin e ri dhe t’i kalojnë reformat që shpresojnë se do të hapin një rrugë të re shpëtimi nga stuhia e skandaleve, që po simbolizohet me rënien e liderit veteran të këtij institucioni, Sepp Blatter. Gara për presidentin e ri është shndrruar në një betejë Evropë – Azi, ndërmjet sheikut Salman bin Ebrahim Al Khalifa dhe Gianni Infantinos.
Por, ish-zëvendëspresidenti i FIFA-s, princi Ali bin al Hussein mori një shtytje të premten, duke u përkrahur nga SHBA dhe Australia. Rezultati është i pasigurt dhe ekspertët thonë se liderët e futbollit nuk do të jenë në gjendje që t’u ikin hetimeve për korrupsion multi-nacional, pavarësisht se do të zgjidhet presidenti i ri. Blatter, 70 vjeç, do të mungojë në kongresin e jashtëzakonshëm në Zyrih. Policia zviceriane arrestoi zyrtarë të FIFA-s në Zyrih, dy ditë para ri-zgjedhjes së tij në majin e vitit të kaluar. Që atëherë, Blatter është përjashtuar nga futbolli për gjashtë vite për shkelje të etikës dhe mund të përballet me akuza penale.
