Në korridoret e kongresit të FIFA-s në Zyrih të Zvicrës, po luhet një dramë që ka brenda pak futboll dhe shumë politikë. Hetimet e fundit të FBI rreth korrupsionit në katet e larta të organizatës, kanë bërë që pushteti absolut i “kapterrit” zviceran Josep Blater, të lëkundet për herë të parë në karrierën e tij të gjatë dhe të shkëlqyer.
Ngjarja ka pasur një efekt bombë mbi punimet e kongresit, aq sa votimi i presidentit historik, nga një procedurë formale, është kthyer në rebus. Nga brenda kongresit pohojnë se krahasuar me herën e shkuar, kur Bletar fitoi votën e 130, nga 209 federatat në gjithë botën, tani gara mes tij dhe kandidatit tjetër, Ali Bin Al Hussein, duket në ekuilibër të plotë. Një zhvillim i paimagjinueshëm që tregon rrënimin e një pushteti deri dje absolut.
Llogaritë që bëhen brenda kongresit thonë se Blater ka humbur tashmë mbështetjen e federatave europiane e të Amerikës Latine. Dy më të fuqishmet e botës. Ndërkohë që ka ende mbështetjen e Azisë, kurse Afrika duket e ndarë.
Dalja sot e kreut të UEFA-s Mishel Platini kundër Blater, ka krijuar një efekt të mëtejshëm negativ për votimin e nesërm, aq sa zv.presidenti i FIFA-s që përfaqëson Europën ka deklaruar tashmë se nëse fiton Blater, do të japë dorëheqjen.