Gjithnjë e më shumë duket sikur fëmijët janë mbipeshë, por në fakt ka shumë gjëra që mund të bëjmë që fëmijët të kenë një peshë normale dhe të shëndetshme. Të qenit mbipeshë në vitet e para të jetës është diçka e keqe, jo vetëm për shëndetin e fëmijëve në këtë periudhë të jetës së tyre parashkollore, por edhe në të ardhmen.
Të vegjlit mbipeshë kanë më shumë gjasa të bëhen të rritur mbipeshë, duke e vendosur veten para rreziqeve të shtuara për një sërë problemesh shëndetësore, duke përfshirë presionin e lartë të gjakut, sëmundjet e zemrës dhe goditje të ndryshme.
Por ajo çfarë është për t’u nënvizuar është se jo gjithmonë është e lehtë të thuhet, nëse një fëmijë i moshës 2-5 vjeç është mbipeshë. Këta fëmijë mund të jenë mbipeshë edhe kur duken se nuk janë të tillë.
Lajmi i mirë është se ju mund të ndihmoni fëmijët tuaj të arrijnë dhe të mbajnë një peshë të shëndetshme.
Si bëhen mbipeshë fëmijët
Ashtu si dhe të rriturit, fëmijët bëhen mbipeshë kur konsumojnë më shumë kalori se sa kanë nevojë, përmes ushqimit dhe pijeve që përdorin. Por, në ndryshim nga të rriturit, fëmijët janë në proces rritjeje, që do të thotë se kanë nevojë për më shumë energji për t’u rritur. Është jetësore, që ata ta marrin këtë energji prej ushqimeve me vlera ushqyese, të shëndetshme dhe jo prej ushqimeve të mbushura me kalori boshe, me yndyrë dhe sheqer. Shumica e fëmijëve mbipeshë nuk kanë nevojë për dietë. Madje, ata as nuk kanë nevojë të humbasin në peshë. Në vend të kësaj, përpiquni thjesht që fëmijët të ruajnë të njëjtën peshë ndërsa zgjaten. Në këtë mënyrë, ata do të jenë shumë afër peshës së shëndetshme. Por, nëse mbipesha e tyre është shumë shqetësuese, është e rëndësishme të ndryshoni zakonet e tyre të të ushqyerit dhe të bëni që fëmijët të kryejnë aktivitet të rregullt fizik.
Ushqim i mirë për fëmijët
Kur vjen puna te dieta e fëmijës suaj, nuk keni nevojë të numëroni kaloritë. Në vend të kësaj, jepuni atyre një dietë të shëndetshme dhe të balancuar, në mënyrë që të krijojnë një stil të ushqyeri të shëndetshëm përgjatë gjithë jetës. Mënyra më e mirë për t’i bërë fëmijët të hanë shëndetshëm është, duke i drejtuar së pari përmes shembullit. Nëse fëmija juaj është mbipeshë mendoni për qëndrimin ndaj ushqimit në shtëpinë tuaj. A hani ju së bashku në tavolinë si një familje, apo merrni copëza ushqimesh dhe përtypeni ndërsa jeni në lëvizje? E mbani televizorin ndezur ndërsa hani? E përgatisni ushqimin vetë apo e merrni gjysmë të gatshëm?
Kini parasysh që të rregulloni vaktet e të ngrënit, në mënyrë që gjithë familja të ulet për të ngrënë së bashku, në vend që të lejoni fëmijët të hanë, kurdoherë që duan të bëjnë diçka të tillë.
Gatuani të njëjtin ushqim për të gjithë, edhe pse mund të mos jetë e mundur për të gjithë që të hanë në të njëjtën kohë. Fikeni televizorin ndërsa hani, pasi nëse televizori është ndezur mund të hani më tepër pa e kuptuar ose të shpërqendroheni.
Bëjini fëmijët të jenë më aktivë
Aktiviteti fizik bën që fëmijët të djegin kaloritë që kanë konsumuar. Aktiviteti fizik është gjithashtu i rëndësishëm, që fëmijët të zhvillojnë kocka dhe muskuj të shëndetshëm dhe të fortë. Veç të tjerave, të qenit aktiv është pjesë e fëmijërisë dhe është vërtet argëtuese. Fëmijët, të cilët mund të ecin vetë duhet të jenë fizikisht aktivë të paktën për tre orë çdo ditë, brenda dhe jashtë shtëpisë. Përveç kohës kur janë duke fjetur, fëmijët nën pesë vjeç duhet të evitojnë të qenit joaktivë për periudha të gjata. Të parit televizor për orë, ose të ndenjurit ulur për një kohë të gjatë në një vend, nuk është mirë për shëndetin dhe për zhvillimin e tyre.
Rregulla për ushqyerje të shëndetshme
Bazojini vaktet e fëmijës në karbohidratë të tillë, si: makarona, oriz dhe patate.
Jepuni të hanë pesë racione frutash dhe perimesh çdo ditë.
Jepuni për të ngrënë proteina të shëndetshme nga mishi, peshku, vezët, fasulet apo thjerrëzat.
Mos u jepni yndyrna të ngopura, të cilat gjenden te mishi i procesuar, byrekët, kekët apo biskotat.
Mos u jepni ushqime me sheqer, si: biskota, kekë apo pije me gaz.
Mos u jepni pije me sheqer, si lëngjet e frutave të ëmbëlsuar dhe pije me gaz dhe nëse u jepni fëmijëve lëngje frutash pa sheqer, hollojini ata me ujë.
Zvogëloni përdorimin e kripës në gatim dhe në tryezë. Shumë fëmijë mbi moshën 4 vjeçare konsumojnë shumë kripë. Ushqimet e gatshme dhe mishi i procesuar, zakonisht përmbajnë shumë kripë.
Ushqimet midis vakteve
Nëse fëmija juaj është i uritur ndërmjet vakteve, jepini atij ushqim të shëndetshëm si fruta të freskët apo një gotë me qumësht. Mënjanoni ushqimet me sheqer, si biskotat, çokollatat apo kekun.
Kalciumi është veçanërisht i rëndësishëm për fëmijët, kështu që sigurohuni që fëmija juaj të marrë tre racione me ushqime të pasura me kalcium çdo ditë. Ushqimet me bazë qumështin janë një burim i shkëlqyeshëm i kalciumit, kështu që këto tre racione mund të jenë një gotë me qumësht, një copë djathë ose kos.
Nga mosha dy vjeç e tutje, mund t’i jepni qumësht gjysmë të skremuar fëmijës tuaj. Qumështi plotësisht i skremuar nuk është i përshtatshëm deri në moshën pesë vjeçare.
Këshilla për ata që nuk duan të hanë
Nëse fëmija juaj refuzon të hajë ushqime të caktuara, mund të duket e vështirë që ta bëni të ndjekë një dietë të shëndetshme.
Përpiquni të ndryshoni zakonet e të ushqyerit të fëmijës suaj hap pas hapi. Së pari, mendoni për zakonet e të ngrënit të pjesës tjetër të familjes, pasi fëmija mund të jetë duke kopjuar pikërisht këto zakone. Nëse ju nuk hani perime, edhe fëmija juaj nuk ka gjasa t’i hajë.
Mendoni se cila është dieta e shëndetshme dhe e ekuilibruar, që dëshironi që fëmija juaj të hajë dhe pastaj bëjeni atë normale në shtëpinë tuaj.
Gradualisht futni në dietën e fëmijës suaj një gamë të gjerë ushqimesh, duke përfshirë fruta dhe perime.
Provoni të ndiqni këto këshilla:
Në fillim jepuni fëmijëve vetëm sasi të vogla të ushqimeve me të cilët nuk janë familjarë. Lavdërojeni fëmijën tuaj që po provon ushqime të reja, por mos e kritikoni në qoftë se nuk e bën. Vaktet e të ngrënit duhet të jenë kënaqësi, jo stresuese apo t’i ngjajnë një testi.
Të dhënat tregojnë se ushqimet e reja, nganjëherë duhet të ofrohen deri në 15 herë para se të pranohen nga fëmijët, por ju duhet t’ua ofroni këto ushqime në sasi shumë të vogël çdo herë. Jini i durueshëm dhe vazhdoni t’i jepni ushqim fëmijës tuaj në raste të ndryshme.
Shije.al
