Legjenda Roger Federer vazhdon të dominojë në tenis, duke fituar sot grand slemin e Australia Open, pas triumfit 3-2 në finale ndaj rivalit spanjoll Rafael Nadal (6-4, 3-6, 6-1, 3-6, 6-3 shifrat e pesë seteve). Një finale magjike, që zgjati 3 orë e 38 minuta, mes dy ikonave të tenisit botëror.
Ky është grand slemi nr.18 i Federer, si askush tjetër, që fiton në Melburn për të pestën herë në karrierë. Sfida finale mes dy miqve-rivalë ishte një spektakël i vërtetë, dy legjenda që rimorën skenën kryesore të tenisit botëror dhe treguan se nuk janë ende “pleq”. Federer, 34 vjeç, rikthehet fitues në një turne të madh pas pesë vitesh (triumfi i fundit në Wimbledonm, 2012) dhe këtë gjë e bën duke mundur makthin e tij më të madh Nadal.
Seti i parë është i ekuilibruar në pikët e para, por pas barazimit 3-3 është Federer që fiton një “game” me topat e spanjollit, shkëputet 4-3 dhe fiton setin 6-4. Në të dytin loja nis shkëlqyeshëm për Nadal, që shkëputet 4-0, i reziston rikthimit të Federer për të fituar 6-3 dhe barazon 1-1 setet. Por zvicerani nuk heq dorë, zhvillon një set të tretë të përkryer, ku dominon dhe fiton thellë 6-1, duke dalë sërish në epërsi 2-1 me sete. Por loja ndryshon sërish kah në setin e katërt, me Nadal që rikthehet sërish protagonist, shkëputet dhe fiton 6-3 setin, duke barazuar për të dytën herë shifrat e seteve, këtë herë 2-2 dhe gjithçka shkon në setin final.
Mjaft emocionues dhe i ekuilibruar seti final, me Nadal që e nis mirë, duke u shkëputur 3-1, por nuk arrin të kapitalizojë këtë avantazh. Federer është magjik, beson te forcat e tij dhe arrin të fitojë 5 “game” radhazi, duke përmbysur shifrat dhe fituar 6-3 seti final. Pika e fundit ishte një aventurë më vete, pasi ajo u vendos nga kompjuteri, që e dha gjuajtjen e Federer brenda. Tenisti zviceran feston si i çmendur këtë triumf, me lot në sy, por në fund arriti një sukses të merituar, duke treguar se një legjendë si ai nuk perëndon kurrë. Pushimi 6-mujor që ai bëri gjatë muajve të fundit dha frutet e tij, duke e rikthyer një kampion.
/telesport
