Federata Evropiane e Hendbollit (EHF) ka dënuar Federatën Serbe të Hendbollit (FSS) me gjobë monetare prej 15 mijë eurosh dhe me ndalesë për organizim të turneve për skuadra kombëtare të kategorive për juniorë në periudhë prej dy vjetësh.
Siç raporton media serbe në Kosovë, “Kossev”, vendimi është marrë për shkak të anulimit të turneut kualifikues të muajit mars për juniorë ku është dashur të marrë pjesë edhe ekipi i Kosovës. Në shpjegimin e vendimit thuhet se Serbia duhet të paguajë menjëherë gjysmën e gjobës, ndërsa gjysma e dytë duhet të paguhet brenda dy vjetësh, periudhë gjatë së cilës FSS-ja do të jetë e “kushtëzuar”, transmeton Koha.net.
EHF ka njoftuar të ketë marrë parasysh edhe rreziqet e sigurisë të cilat Serbia i ka paraqitur si arsye për anulim të ndeshjes, por ka vlerësuar se ndeshja ka mundur të zhvillohet, dhe se edhe vetë EHF i kishte shqyrtuar rreziqet e mundshme të sigurisë. Serbia ka 7 ditë kohë për të paraqitur ankesë në këtë vendim.
Kosova dhe Serbia është dashur të përballeshin në Kovilovë më 23 mars të këtij viti, por me vendim të ministrit të Punëve të Brendshme, Nebojsha Stefanoviq, ndeshja u anulua për shkak të “arsyeve të sigurisë”. Kujtojmë se përfaqësuesja U-20 e Kosovës në hendboll për femra e kishte fituar me rezultat zyrtar ndeshjen ndaj Serbisë, përgatiti Koha. (b.an)
