Ivan Perisiçit i zbutet dënimi, Mauro Icardi dënohet me dy ndeshje. Mauro Icardi është dënuar me dy ndeshje pasi gjuajti topin në drejtim të gjyqtarit pas përfundimit të ndeshjes me Juventusin, ku ekipi i Piolit humbi 1:0, derisa është aprovuar apeli i Interit për Ivan Perisiç, i cili do të mungojë tani vetëm një ndeshje.
“Mauro Icardi është dënuar me dy ndeshje dhe 10 mijë euro, derisa është pranuar apeli i Interit për Ivan Perisiç, të cilit i është reduktuar dënimi në vetëm një ndeshje, derisa për ndeshjen e dytë do të paguajë 10 mijë euro”, thuhet në njoftimin e Federatës së Futbollit të Italisë.
Kështu, Perisiç do të jetë i gatshëm për ndeshjen kundër Bolognas javën e ardhshme, derisa Icardi do të mungojë këtë vikend ndaj Empolit dhe në ndeshjen kundër Bolognas, përgatiti “Express”. (b.an)
