Fatos Lubonja shkruan sot tek Panorama, se me fitoren në Dibër, Edi Rama është duke putinizuar Shqipërinë.
Sipas tij, PD është e pafuqishme që ta ndalë Ramën dhe mund të qendrojë përjetësisht në opozitë.
Ai i mëshon sërish idesë për një lëvizje të re politike.
“Rreziku i këtij putinizmi apo fashistizimi të vendit mund të luftohet vetëm duke mobilizuar mosbesuesit, indiferentët, të lodhurit dhe të varfrit që s’duan të jetojnë me krim apo ta shesin votën për 2000 lekë. Parulla që duhet ngritur është: të përfaqësohen të papërfaqësuarit.
A mundet Partia Demokratike ta bëjë këtë punë. Duket një mision gati i pamundur.
Më së shumti duket se kjo parti pret të trashen zullumet e kësaj bande në pushtet, derisa njerëzit të shkojnë të kërkojnë ndihmë e shpëtim te banditët e saj.
Por, siç e vërtetoi Dibra, ky variant duket gjithnjë e më i vështirë.
Kështu siç është PD-ja mund të shërbejë fare mirë si parti e përjetshme opozitare në sistemin putinist”, shkruan Lubonja.
“Në këto kushte situata është tejet e rëndë dhe prapë do të thosha se rruga më e shkurtër është ajo që duket më e gjata dhe më e pamundura: krijimi i një lëvizjeje që të përfaqësojë të papërfaqësuarit, me njerëz të rinj, me fytyra të reja, që ngjallin besim e shpresë.
Kjo lëvizje duhet të jetë e gatshme të bashkëpunojë edhe me opozitën, por pasi ka parë se ajo ka reflektuar dhe ka bërë ndryshime serioze dhe bindëse për të hequr dorë nga mendësia e sjelljes thjesht si një bandë që lufton me banditët e vet për të ripushtuar territoret e humbura”, shkruan ai.
Sipas Lubonjës, janë disa arsye që kjo PD nuk ka shpresë.
Së pari, rënia e besimit tek opozita.
“Aq i vogël është ky besim, saqë në Dibër një pjesë preferuan më mirë të marrin 2000 lekë për votë sesa të investojnë te PD-ja. Sigurisht kjo vjen për shkak të përvojës së akumuluar tashmë se do të votonin për pasurimin e të njëjtëve oligarkë me të njëjtin stil pasurimi: grabitjen”, shkruan Lubonja.
Së dyti, sipas Lubonjës, faktor është edhe rënia e ndikimit të së kaluarës:
“Varfëria, injoranca dhe kulti e parasë, si e mira që siguron të gjithë të tjerat, ka avancuar së bashku me avancimin e zhdukjes së brezave të së kaluarës, duke e bërë elektoratin gjithnjë e më të pandjeshëm ndaj të kaluarës historike”.
Së treti, shkruan Lubonja, është pakësimi i oligarkëve opozitarë:
“Në kushtet e vështirësive në rritje ekonomike dhe të politikave monopolizuese të ndjekur nga Rama&Co, të një ekonomie që gjithnjë e më shumë mbahet vetëm me para publike (kur nuk mbahet nga krimi) janë pakësuar biznesmenët që kanë mundësi të mbijetojnë nëpërmjet biznesit të tyre e t’i japin mbështetje opozitës. Për këtë zvogëlim ndikon edhe rritja e numrit të atyre që deri dje kanë ngrënë me të gjithë krahët dhe që gjithnjë e më shumë e shohin pa kuptimtë të paguajnë dy tre parti, sepse u mjafton korruptimi i njërës”.
Dhë së fundi, sipas Lubonjës, shkak është edhe ekonomia kriminale, a thua se më përpara nuk ekzistonte ajo!
