I sh-kreu i Shërbimit Informativ Shtetëror, Fatos Klosi deklaroi ditën e djeshme se me ekstradimin e ish-truprojës së Sali Berishës, Izet Haxhisë dosja e vrasjes së Azem Hajdarit duhet të rihapet. Gjatë një prononcimi për gazetën “SOT”, Klosi theksoi se për ngjarjen në fjalë janë dënuar vetëm ekzekutuesit dhe jo ata që e kanë planifikuar vrasjen. Sipas tij, me rikthimin e Izet Haxhisë në Shqipëri mund të dalin në dritë fakte të reja. “Asnjëherë nuk është vonë fare, më mirë të thuhet e vërteta dhe unë këtë kam kërkuar, por të shohim. Nuk e di çfarë faktesh të reja ka ai se në këtë punë nuk ka dokumente të shkruara. Ai do thotë opinionin e vet, pastaj këtë opinion që ne e kemi dëgjuar tashmë se ai ka shkruar libra, ka folur fort. Të shohim tani çfarë do të bëjë gjykata. Është puna e saj. Dosja e vrasjes së Azem Hajdarit duhet të hapet. Janë dënuar vetëm ekzekutuesit dhe jo ata që e kanë organizuar atë punë. N.q.s ky ka gjëra që nuk i ka thënë në gjyq herën e parë, mirë se të vijë le t’i thotë. Është bërë një proces i tërë, është një histori që sipas gjyqit është e mbyllur. Megjithatë mund të rihapet”, u shpreh Fatos Klosi.
Përfshirja e ish-kryeministrit
Si një nga njerëzit që ka edhe më shumë informacion në lidhje me këtë ngjarje pasi në atë kohë ka qenë kreu i SHISH, Klosi përmendi edhe emra, të cilët ai i dyshon si organizatorët e vrasjes së Hajdarit. Për Klosin, ish-kryeministri Sali Berisha qëndron në krye të grupit, duke e lidhur këtë edhe me faktin se fare pak minuta pas ekzekutimit të Hajdarit, Berisha doli në një konferencë për shtyp ku dha detaje për ngjarjen. “Edhe unë kam kërkuar që të rihapet se aty dolën vetëm ata që kanë kontribuar direkt, por nuk u tha kurrë kush i mbështeti, kush i frymëzoi, etj. Unë kam një opinion për këtë, sipas meje në këtë punë Berisha ka qenë brenda. Nuk e diskutoj këtë gjë. Ai është i pari që pa kaluar as dhjetë minuta nga ngjarja, tregoi se kush e kishte bërë dhe si e kishin bërë. D.m.th, ai e dinte që përpara kush do ta bënte dhe si do të kryhej. Ai e dinte që para, ai e hoqi qafe Azem Hajdarin, është kaq e thjeshtë. Këtë e kam thënë gjithmonë”, tha Fatos Klosi.
Klosi: Berisha shfrytëzoi ngjarjen
Në vijim të reagimit të tij për gazetën, ish-kreu i SHISH theksoi se një pikë shumë e rëndësishme e cila duhet parë sa i takon vrasjes së ish-liderit demokrat, AzemHajdari është edhe shfrytëzimin i kësaj ngjarje. Sipas Klosit, ishte Sali Berisha ai i cili e ka shfrytëzuar politikisht ekzekutimin e Hajdarit, duke bërë edhe luftë në emër të saj. “Për këtë punë edhe bërë një gjyq që zgjati shumë, prokurorë të huaj kanë ardhur dhe dihet tani çfarë roli kanë pasur. Në gjyq është i qartë edhe pozicioni i tij dhe prandaj është dënuar, edhe të tjerë. Është bërë një proces i tërë, është një histori që sipas gjyqit është e mbyllur. Megjithatë mund të rihapet, Duhet parë edhe kush e shfrytëzoi ngjarjen. Personi që e shfrytëzoi më fort politikisht vrasjen e Hajdarit ishte Berisha, pas saj ai bëri gjithë atë luftë në emër të saj. Që atëherë dhe vite më vonë ai e përdori vrasjen si mjet politik”, tha ish-kreu i Shërbimit Informativ Shtetëror, Fatos Klosi./Mimoza IBRA-Sot
a.ç
