Të gjithë farmacistët të cilët kanë mbaruar studimet duhet të bëjnë regjistrimin për t’iu nënshtruar praktikës profesionale. Ndërkohë që, Urdhri i Farmacistit ka publikuar afatet kohore dhe dokumentet e nevojshme për të kryer procedurën. Duke filluar nga data 5 korrik, çdo praktikant duhet të paraqesë pranë zyrave të “Urdhrit” brenda datës 15.07.2016 një sërë dokumentesh. Kështu, për t’u regjistruar kandidati duhet të dorëzojë vetëdeklarimin sipas një dokumenti tip, që mund të shkarkohet në faqen online ‘ufsh.org.al’ si dhe kontratën për kryerjen e praktikës profesionale.
Po ashtu, kandidatët duhet të dorëzojnë fotokopjen e certifikatës së anëtarësimit në UFSH të drejtuesit të praktikës, fotokopjen e noterizuar të diplomës dhe listës së notave; fotokopjen e kartës së identitetit si dje një raport mjeko-ligjor. Dokumentacioni duhet të plotësohet me fotokopjen e plan-vendosjes së farmacisë, tre fotografi si dhe mandat pagesën në shumën 10000 lekë. Pagesa duhet kryer në numrin e llogarisë 69623 pranë bankës BKT. Këto regjistrime janë të vlefshme për kryerjen e praktikës profesionale për sezonin korriktetor 2016, ndërkohë që ajo duhet të kryhet në farmacitë e rrjetit të hapur ose spitalore, nën drejtimin e një farmacisti me jo më pak se 3 vjet përvojë pune.
Urdhri i Farmacistit saktëson se për t’u regjistruar në praktikën profesionale, kandidati duhet të paraqitet personalisht, pasi duhet të plotësojë kërkesën për regjistrimin dhe vetëdeklarimin e praktikantit. Në momentin e dorëzimit të dokumenteve të nevojshme, do të bëhet edhe nënshkrimi i kontratës, e cila rregullon marrëdhënien midis praktikantit dhe drejtuesit të praktikës, ndërsa një kopje e saj duhet të dorëzohet në zyrën Urdhrit të Farmacistit të Shqipërisë në momentin e fillimit të praktikës.
VLERËSIMI
Pas përfundimit të praktikës profesionale, praktikanti duhet t’i nënshtrohet një provimi vlerësues dhe vetëm nëse ky provim kalohet, praktika profesionale quhet e kaluar me sukses. Për këtë, kandidat duhet të përfitojë 50-100 pikë, ndërkohë që praktikantët që marrin 0-49 pikë duhet të përsëritin vlerësimin e aftësimit praktik. Kalimi me sukses i praktikës profesionale është një kusht për të hyrë në provimin e shtetit. Ndërkohë që, vetëm kandidati që vlerësohet pozitivisht në provimin e shtetit ka të drejtën e ushtrimit të profesionit.
BW/d.i.
